Asteazkena, uztaila 6, 2022

Zer da ZTB?

 

>> Egitaraua 2021 (pdf formatuan deskargatu)

ZTB Jardunaldiak 2021

Gure helburua

 

Beste urte batez Zientzia, Teknologia eta Berrikuntza, ZTB jardunaldiak antolatu ditugu. Jardunaldion  helburu nagusia da zientzia, teknologia eta berrikuntza esparru guztietara gizarteratzea eta sustatzea.

Ekimen honekin ere, beste hainbatekin egiten dugun moduan, edota Laboratorium Museoaren ohiko  jarduerarekin egiten dugun bezala, kultura zientifikoaren dibulgazioan ekarpena egin nahi dugu. Izan ere, urtez urte, zazpigarrena izango da aurtengoa, ekarpen interesgarriak egiten dituzte bertan parte hartzen dute aditu eta arituek. Eta Bergaratik kanpora ere egiten da ekarpen hau. Ezin dugu ahaztu Bergarak historian zehar, eta bereziki XVIII. mendean, Errege Seminarioaren bitartez zientziarekin eta dibulgazioarekin izan duen lotura.

Ekimenak duen balio erantsi bat nabarmentzen amaitu nahiko nuke. Eragileen arteko elkarlana. Izan ere, hilabetez egingo diren jarduerak antolatzeko lan-talde bat aritzen da hilabete luzez lanean, udaleko eta Laboratoriumeko kideekin elkarlanean. Aurten 17 eragilek egin dituzte ekarpenak.

Zientziaren esparruan ari garenok maiz aldarrikatzen dugu egunerokoan zientziak eta teknologiak duten ezinbesteko papera. Ezezaguna askotan, baina eragin zuzena dute gure bizitzetan aipatutako gaiek, eta horregatik, beharrezkoa da jende guztiari zientzia gerturatzea, nolabait “zientziaratzea”. Bereziki nabarmen ikusi baita hutsune hau pandemia garaian.

Zientzia, teknologia eta berrikuntza ardatz hartuta, formazioa eta dibulgazioa askotariko  esparruetatik landuko ditugu: hitzaldiak, erakusketak, azoka, ikasleentzako jarduerak, tailerrak, Wolfram Encounterra… Bihar, urriak 19, hasiko gara jardunaldiekin, eta azaroaren 21ean amaituko dugu.

Askotariko hartzaileak izaten dituzte jardunaldi hauek, eta hori ere bada aberasten dituen ezaugarrietako bat. Jarduera batzuk gaian adituak direnei zuzendutakoak badira ere, beste asko publiko orokorrari begirakoak dira. Bereziki iruditzen zaigu interesgarria ikastetxeen bitartez gazteengana heltzea, erakargarri zaizkien formatuen bitartez.

Iazko osasun egoerak bultzatu gintuen hainbat saio streaming bidez ematera. Horrek aukera eman zigun bestela helduko ez ginen pertsona batzuengana heltzeko. Balorazio ona egin genuen iaz, eta aurten ere Seminarixoko saioak zuzenean ikusteko aukera egongo da. Edukiera mugak zabaldu badira ere, jendeari gomendatzen diogu aurrez izena ematea, Laboratoriumen, telefonoz edo emailez (943 76 90 03 edo laboratorium@bergara.eus). Jardunaldien inguruko informazioa ztbergara.eus webgunean egongo da eskuragarri.

Jardunaldiek iraungo duten hilabetean,  eskuko programan ikusiko duzuenez, askotariko formatutan landutako gai asko jorratuko ditugu. Adibidez, sona handiko hizlariak izango ditugu gurean, esaterako, bihar bertan, goizeko 10:00etan eta 18:00etan Seminarixoan “Ekologismo erreala. Zientziaren ikuspegitik, zer egin dezakezu planeta babesteko” hitzaldia egingo du Jose Miguel Muletek, Valentziako unibertsitatean Bioteknologia katedradunak.

Batzuk aipatuko dizkizuet. Enpresekin barnetegi-teknologikoa egingo dugu azaroaren 12an Miguel Altuna Institutuan. Mondragon Unibertsitateko Beatriz Laskurainek gidatuta, “Adimen Artifiziala zer den eta zein aplikazio duen negozio-estrategian” goiburupean.

Bestetik, emakumeak zientzian duen papera ikusgarria egiteko apustuarekin ere bat egiten dugu. Hala, azaroaren 2an Elhuyarren “·Zientziaren izarrak. Emakumeak itzaletik argira” liburua aurkeztuko da Seminarixoan.

Euskararen gaia ere txertatu dugu aurtengo jardunaldietan. “Euskara Adimen Artifizialaren garaian” izenburupean mahai-ingurua egingo dute Eusko Jaurlaritzako Miren Dobaranek, Gipuzkoako Foru Aldundiko Joxean Amondarainek eta Elhuyarreko Josu Aztiriak. Euskarari lotuta, herritarrei auzolanerako deialdi bat ere egingo diegu. Azaroaren 13an, Librezale.eus-ek gidatuta, “Euskarazko ahotsen grabaketa maratoia”, teknologiarekin euskaraz aritzeko auzolan digitala izango da. Aurrerako emango ditugu xehetasun gehiago.

Bi erakusketa ere egingo dira.

Gazteei begirako hainbat ekimen egingo dira. Hezkuntzarako proposamen osatua egin dugu elkarlanean. Honela, ikasleek hitzaldiak jasoko dituzte adituengandik, adibidez, baina are garrantzitsuagoa eta emankorragoa iruditzen zaigu haiengana hurbiltzeko bestelako ekitaldiak egitea. Hala nola, Zientziako esperimentuak egingo ditugu, escape room teknologikoa egingo dute LH5 eta LH6ko ikasleek azaroaren 8an.

Wolfram Encounterra berreskuratuko da iazko etenaren ondoren. Bideo-jokoen lehiaketa.

Azaroaren 19an, Itsaso Arrayagorekin “Bailarako ikertzaile gazteak etorkizuneko mundua moldatzen” hitzaldi-sorta egingo da.

X