ZTB jardunaldien barruan antolatutako bigarren erakusketa inauguratu da gaur. “Hidrogeno berdea klima aldaketaren konponbidea?” izenburua du Laboratorium Museoan jarri den erakusketak. Otsailaren 15era arte egongo da ikusgai. Une honetan mundu mailan lehen lerroan dagoen gaietako bat jorratzen du aipatu erakusketak: klima aldaketa.

Inaugurazio ekitaldian egon dira Bergarako alkate Gorka Artola, Laboratorium Museoko arduradun Rosa Errazkinekin bateraTecnaliako ikerlari Susana Pérez Gil bergararra eta Izaskun Alberdi ilustratzaile zientifikoa. Paneletan dauden ilustrazioak EHUren, eta Laboratoriumek laguntzen duen Ilustrazio Zientifikoa Garduondoko ikasleek egin dituzte.

Erakusketa honetan hidrogeno berdearekin erlazionatutako galdera askori erantzuna eman nahi zaio: zer da? Nola ekoizten da? Jasangarria da?

Panelez gain, Hidrogenoa lortzeko Voltametro bat dago esperimentatzeko eta bestetik, egunerokoan zenbat CO2 sortzen dugun kalkulatzen duen excell bat eskuragarri dago erakusketan, baita hidrogenoz funtzionatzen duten jostailuzko kotxe txiki batzuk ere. Horiez gain, eta Javier Tejadaren bideo bat ere eskainiko da.

Bailarako ikertzaile gazteen ekarpenak mintzagai bihar

Zientzia eta teknologiaren arlo desberdinetan bailarako ikertzaile gazteen ekarpenak ezagutzeko aukera paregabea izango da, ikertzaileek beraiek azalduta. Hau guztia arratsaldeko 18:00etan, Seminarixoan.