HIZLARIAK:

Leire Lisón “Humanitate Digital Globalak” gradua amaitu berri duen ikaslea da. “Filosofia: Zientzia, Gizartea eta Teknologia” Masterra egiten ari da EHUn eta 2022tik Badalabekin elkarlanean ibili da gazteak eta digitalizazioaren inguruko proiektuak egiten. Bere gradu amaierako lanean Euskal Herri osoko hainbat ikastetxerekin elkarlanean aritu zen bere ikerketa garatzen: “Gazteek digitalizazioaz dituzten irudikapen sozialak: Euskal Herriko ikasleen kasua”.

Goiatz Oiartzabal Lakarra (Pasai Antxo, Gipuzkoa, 1983) Badalab hizkuntza berrikuntza laborategiko zuzendari lanetan dabil gaur egun. Formakuntzaz ingeniaria, bere lan ibilbidearen zati handia igaro du Fagor Arrasaten, industriaren eta kooperatibaren munduan hain zuzen, berrikuntza alorrari estuki lotuta. 2018. urtetik aritu da Badalaben sorrerari ekarpena egiten, Mondragon Unibertsitatean irakasle edota Debagoiena 2030 Garapen Iraunkorreko Sarean prozesu arduradun lanetan zebilen bitartean. 2021. urteko abenduan hartu zuen zuzendari kargua laborategian.

Digitalizazioa Euskal Herrian

Filosofiatik abiatuta, Leire Lisonek digitalizazioari buruzko hausnarketa kritikoa egingo du. Historian murgilduta, 60 urteko bidaiari ekingo dio, transformazio digitalak mundu osoan eragin nabarmena izaten hasi zenetik: ordenagailu pertsonalak, Internet, Smartphoneak, Adimen Artifiziala… Kanpotik etorritako olatuak Euskal Herria nola blaitu zuen aztertuko du. Horren aurrean, euskaratik eta burujabetzatik itsasaldia nabigatzeko sortzen ari diren ahaleginak mahaigaineratuko ditu.

HELBURUAK: Gazteek transformazio digitala ikuspuntu historiko, kritiko zein burujabetik aztertzea.

Miren Fernandez-ek TZBZ enpresatik hitzaldiko grafic recording-a prestatu digu: