ZTB Jardunaldiak 2024

Bergarak historian zehar, eta bereziki XVIII. mendean, Errege Seminarioaren bitartez, zientziarekin eta haren dibulgazioarekin lotura handia izan du. Garai hartan Europako berrikuntzak Bergarara ekarri, aztertu eta herritarren artean zabaltzen zituen, Ilustrazioaren ildoei jarraituta.

XIX. mendean ere Errege Seminarioa lehen mailako hezkuntza eta ikerketa zentroa izan zen Euskal Herrian, eta oso garrantzitsua Estatu espainiarrean. Izan ere, XIX. mendean Errege Seminarioan Eskola Industriala jarri zen, ingeniariak formatzeko. Ingeniarien eskola hau bakarra zen Euskal Herrian. Estatu espainiarrean soilik lau zeuden 1850. urtean.

Ordutik ez da hari hori eten, eta zientzia, teknologia eta berrikuntzaren dibulgazioan lanean jarraitu du Bergarak. Esaterako, Zientzia, Teknologia eta Berrikuntza, ZTB jardunaldien bitartez. Zientzia, teknologia eta berrikuntza esparru guztietan gizarteratzea eta sustatzea da helburua. Ezezaguna askotan, baina hiru gai horiek eragin zuzena dute gure bizitzetan, eta horregatik, beharrezkoa da jende guztiari zientzia gerturatzea, nolabait “zientziaratzea”.

Jardunaldiok IKT astean dute jatorria. Ondoren, eta 2015ean Laboratorium Museoa zabaltzearekin  bat, Zientzia, Teknologia eta Berrikuntza jardunaldiak antolatzen hasi zen Bergarako Udala Laboratoriumekin elkarlanean.

IKT astearen hasierako helburua eskualdeko enpresen artean berrikuntza teknologikoari buruzko ezagutza zabaltzea zen. Hortik abiatuta, eskaintza programa handituz joan da, eta parte-hartzaileak eta espezializazioak biderkatzen.

ZTB jardunaldietan askotariko diziplinak lantzen dira, formatu anitzetan, publiko desberdinari bideratuta eta erakunde zein eragile desberdinen eskutik.

2024. urteko jardunaldien ardatz edo gai nagusia Adimen Artifiziala da.  Gaur egun gizartean pil-pilean dagoen gaia izanik, horren nondik norakoak ezagutzea eta lantzea beharrezkoa da, hemendik aurrera  hartuko ditugun erabakiak egokienak izan daitezen eta, beraz, gizarteak modu eraginkorrean egin dezan aurrera.

Teknologia honek gure gizartean izango duen eragin sakonaren inguruan ezagutza partekatu eta aprobetxatu ahal izateko, ondorengo helburu hauek lortu nahi ditugu:

1. Ezagutza partekatzea eta zabaltzea: AAko jardunaldien ekimena aukera paregabea da azken ikerketak, aurrerapen teknologikoak eta proiektu berriak komunitateari aurkezteko, alor desberdinetako ezagutza aberastu eta zabaltzeko.
2. Sare profesionalak sortzea: Jardunaldi hauek topagune dira AA arloan lan egiten duten profesionalentzat. Honek aurrerapen teknologikoak sustatzen ditu eta lankidetza berriak errazten ditu.
3. Joera eta teknologia berrien berri izatea: AA etengabe aldatzen eta garatzen ari den arloa da. Jardunaldi hauek etorkizuneko joerak eta erronkak ezagutzeko aukera ematen dute, eta parte-hartzaileei alor horretan puntako berrikuntzak ezagutzeko abagunea eskaintzen diete.
4. Sentsibilizazioa eta gizarte-eragina: Jardunaldi hauetan, AAren eragin etikoak, sozialak eta ekonomikoak aztertzen dira. Garrantzitsua da publikoari eta eragileei teknologia honen potentziala zein arriskuak ezagutaraztea, gizarte osoari eragin diezaiokeelako.
5. Ikaskuntza eta formakuntza: Ikasle, ikertzaile eta profesionalentzako ikaskuntza- eta formakuntza-aukera dira jardunaldiak. Tailerrak, hitzaldiak eta erakusketak izango dira, non AArekin zerikusia duten tresna eta teknika berriak ikasi eta esperimentatzeko aukera emango den.
6. Berrikuntza sustatzea: Jardunaldiak aukera ezin hobea dira ideiak elkartrukatzeko eta berrikuntza teknologikoa sustatzeko. Enpresek eta ikerlariek beren proiektuak aurkezten dituzte eta horrek askotan aliantza berriak eta proiektu berritzaileak sortzea eragiten du.