Barnetegi teknologikoa: Enpresako zibersegurtasuna, zuzendaritzakoentzat

Irakasleak: Jesus Lizarraga eta Miguel Fernandez

Zibersegurtasunaren inguruko kezkak gero eta handiagoak dira enpresetan (enpresa handi nahiz txikietan), erakundeetan eta baita maila pertsonalean ere.

Gertaera bat jasateko arriskua guztiz ekiditea ezinezkoa bada ere, edozein enpresak arrisku hori hein handi batean murrizteko moduko tresnak eta teknologiak ditugu eskura.
Jardunaldi honetan ikusiko dugu zibersegurtasuneko mehatxuen inguruan zein den egoera, zer nolako arriskuak dituzten aurrez aurre enpresek, eta era erraz batean aztertuko dugu edozein erakundek zein urrats eman beharko lituzkeen zibersegurtasuna ondo kudeatzeko.

Helburuak:

• Ezagutu zeintzuk diren gaur egungo mehatxuak zibersegurtasun-alorrean.
• Gai izan norberaren enpresak izan ditzakeen arriskuak identifikatzeko.
• Identifikatu zein urrats jarraitu behar diren zibersegurtasuna ondo kudeatzeko.

Norentzat:

• Gerenteak, zuzendariak, sail-arduradunak, negozio-arduradunak

Edukia:

• Zer da zibersegurtasunaren gai hau? Benetan kezkatu beharko nintzateke? Mehatxuak lehen, orain eta etorkizunean
• Nola jarduten du balizko erasotzaile batek: ziber-eraso baten froga praktikoa
• Zein beste mehatxu daude segurtasunarekiko? Ziberkriminalez aparte badaude beste mehatxu batzuk, eta pentsatzen duguna baino ohikoagoak dira.
• Zibersegurtasuna industria-ingurunetan: gudu-zelai berria
• Arriskuak aztertzea
• Zibersegurtasunaren alderdi legalak
• Zibersegurtasun-dekalogoa enpresarentzat: 10 arau, jarraitu beharrekoak, gure enpresan zibersegurtasuna zuzen kudeatzen dela bermatzeko
• Saio praktikoa: babestu dezagun gure negozioa

Jesus Lizarraga ingeniari teknikoa da Elektrizitatean, Euskal Herriko Unibertsitatetik (EHU); ingeniaria Informatikan, Mondragon Unibertsitatetik (MU); eta masterra (M.Sc.) Konputazioan, Staffordshireko Unibertsitatetik (Erresuma Batua). Horretaz gain, CISCOko CCNA instruktore homologatua da. 1992an, Goi Eskola Politeknikoko (MGEP) Informatika Sailean hasi zen.

1995etik 2004ra, MGEPko sistemen eta segurtasunaren arduraduna izan zen; epealdi horretan gertu-gertutik ezagutu ahal izan ditu komunikazio-sareek izan ditzaketen segurtasun-arazoak.

2005etik 2010era, Mondragon Korporazioko Segurtasun Informatikoaren Zaintza Teknologikorako Foroan koordinatzailea izan zen.

Hamarretik gorako ikerketa-proiektutan hartu du parte, baita kontratupean ere, hainbat enpresa eta administrazio publikotan, bai tokiko bai nazio mailan.

Gaur egun, MUko Goi Eskola Politeknikoko Telematikaren alorra koordinatzen du. Halaber, Mondragon Unibertsitateko zibersegurtasunaren arduraduna da eta Zibersegurtasunari buruzko Masterreko koordinatzailea. Graduondoko ikastaroetan irakasle-lanetan aritzeaz gain, enpresei ere prestakuntza eta aholkularitza eskaintzen dizkie. Gaur egun, bere lan-eremuak hauek dira: zaintza, monitorizazioa eta komunikazioak.

Profil publikoak:

• https://twitter.com/JL_picard
• https://www.instagram.com/jl_picard/
• https://www.linkedin.com/in/jlizarraga/

http://www.mondragon.edu/eps/jor/seguridad/JornadaSeguridadMCC-MU.htm

Goi mailako ingeniaria Telekomunikazioetan (Bilboko Ingeniarien Goi Mailako Eskola). Cisco Systems-eko CCNA programan instruktorea.

Nire lanbidearen hasieran, sare eta sistemetako teknikaria izan nintzen hainbat banku- eta industria-korporaziotan, non esperientzia handia hartu nuen datu-sareak diseinatzen, ezartzen, mantentzen eta kudeatzen.

Mondragon Unibertsitateko irakasle izanik, Ingeniaritzako ikasgaiak ematen ditut, Telematika eta Segurtasun alorrekoak: Komunikazio Industrialak, TCP/IP Sareak, Segurtasuna eta Goi Mailako Jardun Denbora, Sistema Txertatuentzako Sareak (IoT, Gauzen Interneta)…     Unibertsitateak eskaintzen duen hacking etikoari buruzko MOOC ikastaroko koordinatzailea naiz.

Unibertsitateko etengabeko prestakuntzaren programaren barruan (MU Plus), ikastaroak ematen ditut profesionalentzat eta industria-elkarteentzat. Unibertsitateko hainbat masterretan hartzen dut parte.

Ikerketa-lana ere egiten dut, Sareen Segurtasunaren eremuan, bereziki sare industrialetan. Enpresentzako hainbat ikerketa- eta aholkularitza-proiektutan hartu dut parte.